ട്രംപ് കണ്ണുരുട്ടിയോ? ട്രംപിനെക്കുറിച്ചുള്ള പോസ്റ്റ് ഡിലീറ്റ് ചെയ്ത് ബിജെപി എംപി കങ്കണ റണാവത്ത്
ന്യൂഡൽഹി | അമേരിക്കൻ പ്രസിഡന്റ് ഡൊണാൾഡ് ട്രംപിനെക്കുറിച്ചുള്ള തന്റെ പോസ്റ്റ് ഡിലീറ്റ് ചെയ്തതായും സോഷ്യൽ മീഡിയയിൽ തന്റെ “വളരെ വ്യക്തിപരമായ അഭിപ്രായം” പങ്കുവെച്ചതിൽ ഖേദിക്കുന്നതായും നടിയും ബിജെപി എംപിയുമായ കങ്കണ റണാവത്ത് വ്യാഴാഴ്ച പറഞ്ഞു.
ബിജെപി ദേശീയ പ്രസിഡന്റ് ജെ പി നദ്ദയിൽ നിന്ന് ഒരു കോൾ ലഭിച്ചതിനെത്തുടർന്ന് പോസ്റ്റ് ഡിലീറ്റ് ചെയ്തതായി റണാവത്ത് പറഞ്ഞു.
“ആപ്പിൽ സിഇഒ ടിം കുക്കിനോട് ഇന്ത്യയിൽ നിർമ്മാണം നടത്തരുതെന്ന് ട്രംപ് ആവശ്യപ്പെട്ടതിനെക്കുറിച്ച് ഞാൻ പോസ്റ്റ് ചെയ്ത ട്വീറ്റ് ഡിലീറ്റ് ചെയ്യാൻ ബഹുമാനപ്പെട്ട ദേശീയ പ്രസിഡന്റ് ശ്രീ @JPNadda ജി എന്നെ വിളിച്ചു.
“എന്റെ ആ വ്യക്തിപരമായ അഭിപ്രായം പോസ്റ്റ് ചെയ്തതിൽ ഞാൻ ഖേദിക്കുന്നു, നിർദ്ദേശപ്രകാരം ഞാൻ അത് ഉടൻ തന്നെ ഇൻസ്റ്റാഗ്രാമിൽ നിന്നും ഇല്ലാതാക്കി,”റണാവത്ത് എക്സിൽ എഴുതി. ഗൾഫ് മേഖലയിലേക്കുള്ള നാല് ദിവസത്തെ സന്ദർശനത്തിന്റെ ഭാഗമായി ഖത്തറിലുള്ള ട്രംപ്, ഇന്ത്യയിൽ ഐഫോണുകൾ നിർമ്മിക്കാൻ താൻ ആഗ്രഹിക്കുന്നില്ലെന്ന് ആപ്പിൾ സിഇഒ ടിം കുക്കിനോട് പറഞ്ഞിരുന്നു.
