ഇനി നമുക്ക് ജോലി ചെയ്ത് ജീവിക്കാം; പി സരിനെ പരിഹസിച്ച് കോൺഗ്രസ് നേതാവ് ഡോ. എസ്.എസ് ലാൽ
പാലക്കാട് ഉപതെരഞ്ഞെടുപ്പിൽ കനത്ത പരാജയം ഏറ്റുവാങ്ങിയ പി സരിനെ പരിഹസിച്ച് കോൺഗ്രസ് നേതാവ് ഡോ. എസ്.എസ് ലാൽ. ആ സ്റ്റെതസ്കോപ്പ് ഉപകരണം കളയണ്ടെന്നും ഇനി നമുക്ക് ജോലി ചെയ്ത് ജീവിക്കാം എന്നുമാണ് എസ്.എസ് ലാൽ ഫേസ്ബുക്കിൽ കുറിച്ചത്. അനിയാ, ഇനി ആ ചിഹ്നം ഉപേക്ഷിച്ചോളൂ. എന്നാൽ ആ സ്റ്റെതസ്കോപ്പ് ഉപകരണം കളയണ്ട. ഇനി നമുക്ക് ജോലി ചെയ്ത് ജീവിക്കാം. ഒരേ തൊഴിൽ പഠിച്ചയാളെന്ന നിലയിൽ അക്കാര്യത്തിൽ ഞാൻ ഇനിയും ഒപ്പമുണ്ട്. രാഷ്ട്രീയം ഒഴിച്ചുള്ള കാര്യങ്ങളിൽ പഴയതുപോലെ എന്നെ ഇനിയും വിശ്വസിക്കാം. ലാലേട്ടാ എന്ന ആ പഴയ വിളിക്കായി ഞാൻ വീണ്ടും കാത്തിരിക്കുന്നു. നമ്മുടെ പാർട്ടി ഓഫീസിൽ ഇനി അനിയനെ കയറ്റൂല. എന്നാൽ പാർട്ടി മാറുന്ന തിരക്കിൽ അവിടെ നിന്ന് എടുക്കാൻ മറന്നുപോയ ഖദർ ഉടുപ്പും മുണ്ടുമൊക്കെ അവിടെത്തന്നെയുണ്ടെന്നറിഞ്ഞു. ആവശ്യമുണ്ടെങ്കിൽ അതൊക്കെ തിരികെ വാങ്ങിത്തരാം.’
